#الحرية_للجمهور #الحرية_للجدعان

من صفحة الوايت نايتس الرسمية .

الله ينصركم على الضلم يا فرسان

الحقيقة احنا خرجنا للشارع لاننا مبنعرفش نسكت عن الظلم، اللي بيعرفوا ربنا يعينهم، ويصبرهم، لكن احنا اختارنا حرية جمهورنا، في فرق كبير بين أنك متعرفش العواقب، وأنك تعرف العواقب وتختار الحق، وتقرر تفوق الظلم من طغيانه بوجودك وبصمودك امامه في وقت الكل غاب فيه من امامه

اللي حصل امبارح، هو البداية، كل صاحب مظلمة لما يقرر انه في يوم يفوق، مظلمتك البسيطة قادرة تدخلك معارك اكبر، لان نفوذ أعداءك وأعداء حريتك وحقوقك، ضاربين في قاع الدولة وفي اساسها

احنا في مشوار الحرية بنبقى سعداء اننا لسة بنتنفس هوا غير اللي حوالينا بيتنفسوه، وزى ما كان امبارح صمود، فبكرة نضال، وبعده حرية، احنا اتكسر على ظهورنا انظمة، برضه عشان حاربونا في متعتنا، وعادوا حياتنا وضيقوا الخناق علينا، فاللي مستعد يتضامن مع الطرطور، يلعب ويكسب، علشان دلوقتي مبقاش فيه حياد، بين جمهور عايز حرية وبيدافع عن اخواته المعتقلين ضد الخرطوش والحى، وبين واحد مسرح مؤسسات الدولة تعتقلنا وتحارب وجودنا .. مفيش حياد بين الحق والظلم

أحنا في حربنا على قضايانا عموما فيه بوصلتين لينا، الحق والحرية، و في وقت الشدائد، لما بتغيّم الطرق، الحرية اللي هى أغلى حاجة عندنا، بتهون لأجل بوصلة الحق، لكن ابدا الحق عمره ما يهون.

#الحرية_للجمهور #الحرية_للجدعان